بدر بن عبدالمحسن بن عبدالعزيز من شعراء منتدى احساس حلم

بيجيني السفر

مربوط بالضي ..

مقيِّدٍ بالظل .. مسجون في الناس ..

مديون لكلمةٍ حلوه .. مرهون لي أنفاس ..

قولي لي .. وش أسوي ..

ملعون هالإحساس ..

لو هو حلو وافر ..

قاضبني لا اسافر..

بـ الهون ..لا تكسري هالقيد .. كله أصابع ..

خليني أفك أصابع الحاير المسكون .. بالخوف ..

عن زندي الخادر ..

يكفي مواجع ..

أظنني قادر على الوقوف ..

وقادر على الترحال ..

بس اصبري ..

لا تسافري .. الين أقوم ..

بالله لا تستعجلي ..

لا تزعلي مني ..

أوراقي وثيابي .. خذيها معك ..

بس افتحي بابي .. وخليه ..

في يوم بيجيني السفر ..

ويدخل علي .. واهج مثل الناس ..

قول وش أسوي .. ملعون هالإحساس ..

لوهو حلو وافر ..

قاضبني لا اسافر...

]

أجمل الحزن
يا اجمل الحزن .. لدموعك سلام من حبيبٍ ... بقى منه الكلام
وين انا منك .. غربني الزمان وخانني النور ... وابعدني الظلام
لو بعزيك ... سالت دمعتي تدري الدمع في حبك ... حرام
لو بواسيك ... مايكفي الهوى ولو أبي ... عذر مايكفي الغرام
أعطنى من عذابك يا البعيد صرخةٍ ... تجعل ظلوعي حطام
آه ...لو في يدي أبكي معاك قطرةٍ مادرى عنها الغمام
ماابخل الوقت ... يحرمني البكا وانت لجلك حرمني الإبتسام
يا اطهر الحزن ... لو كان القصيد يكشف الغم عن بدر التمام
لكتب الشمس شعرٍ في سناك وامحي إمن السما...عج وكتام
ياعسي البدر نوره مايغيب عن حبيبٍ بقي منه الكلام

[/b][/size]

]

أبي النسيان

تذكرتك .. وأبي النسيان ألايا خل ساعدني
أنا مالي ورى الذكرى .. إلى مات الأمل خيره
أنا ودي على الفرقا حبيبي لو تعاهدني
وإلى شفتك .. تصد ولاتجيب لما مضى سيره
تخيّر غير هذي الأرض .. مكانٍ به تواعدني
تخيّر لك مكانٍ صعب .. أعرف فيوم تقديره
عسى الجرح الذي يدينك أشوفه عنك يبعدني
أنا اللي أكرهك .. وأحبك .. شعورٍ صعب تفسيره
حسيبك .. يالهوى الظالم .. حسيبك لاتعاندني
بيلقى صاحبي غيري وأباالقى في العرب غيره

تعبت أسافر

تعبت أسافر في عروقي ومليت
من جلدي اللي لو عصيته غصبني
ياما تجاوزت الجسد واستقليت
عن الألم .. لاشك جرحي غلبني
أنا سجين الحال .. مهما تسليت
وانا الطليق وكل شيٍٍ قضبني
حريتي لاعل .. يا كود ياليت
ما شفت حيٍٍ جاد لي ماسلبني
وليت يا ليل التباريح وليت
اما محاني الحزن والاكتبني
كل السما في دفتري وان تجليت
مثل الشموس .. غبار قبري حجبني
لي صاحب وان ما تخلى تخليت
لا بد ما نهدم .. ولا بد نبني

بحر العيون

تقول اللي طرف عينك أنا مدري هدب أو عود
أحس اني من اللي صابها ماشوف قدامي
ضحكت .. وقلت لاتخافي على بحر العيون السود
على شط الكحل مريت .. وهذا موضع أقدامي
أدوّر عن ذهب عمري .. أدور كنزي المفقود
وأشوف الموج يطوي الموج ويبحر مركب أيامي
عيوني بسمة اعيونك ولو صارت مطر ورعود
أبا اشرب من ظما دمعك وابااغسل جرحي الدامي
عطيني عيونك الليلة .. وباكر ياعساه صدود
أمانه لا مسحتي الكحل خلي طيف أحلامي
أحبك كان يكفي الحب جروحي في هواك شهود
أنا اللي راس مالي حلم .. وهم الدنيا قدامي

بسمة الضي
أنا حبيبي بسمته تخجل الضي
يكسف سنا بدر الدجى من جبينه
راعي العيون الناعسه رمشها فّي
وإن سلهمت ذاب الحشا من حنينه
له نظرةِِ لا هي سَرابٍ ولا مَيّ
راعي الهوى تفنى وراها سنينه
نور الصبايا .. بسمة الدّار والحيّ
نوره ولا شمس الضحى تستبينه
دامه معي أغلى الحبايب فأنا حّي
بالقلب أضمّه يوم قلبي ضنينه
له في ضميري من لهيب الوله كي
روحي معه عذب المناجى رهينه
ياصاحبي لا تنشد الروح عن شيّ
أنا حبيبي .. نور كل المدينه

جفن الليل

يطيح جفن الليل واهز كتفه
نجمٍ يشع وباقي الليل مطفي
واحاكي الجدران عن وصف غرفه
ماتشبه الجدران ويطول وصفي
وتملني الجدران واظهر لشرفه
تحت السما واسكر الباب خلفي
ريحٍ تهب وتسكن العظم رجفه
وتموت ريح وتسكن اوراق نزفي
على الروابي تهطل دموع وطفه
وتصب لمع بروقها وسط طرفي
ياطاري الغدران والعمر رشفه
مع قلها ياليتها يوم تصفي
الحب واجد مير الاقدار صلفه
والأرض واجد لكن الحلم منفى
واللي اعرفه راح ماعاد اعرفه
ولاظن يذكرني الى أقبلت مقفي
ماهو حبيبي مورد القلب حتفه
ولا هو حبيبي يفرح بوقت ضعفي
مر ثمر هالليل وأمر قطفه
يالحنظل اللي قمت اذوقه بكفي
متى الشوارع تجمع اثنين صدفه
لا صار شباك المواعيد مجفي
يابنت تو الليل ماراح نصفه
وياليل بعض اللي مضى منك يكفي

أنا النخيل

بين القلم وأصابعي والورق شوق
عشرين حولٍ .. من كتبت القصايد
من يوم بان القلب .. واخفيت بالموق
دمع .. وغـدالي بالمحبه .. وعايد
كتبت ما كني على الشعر مسبوق
وقريت ماكن افـ قصيدي .. جدايد
ونزفت لين اتعبت لا حصل اعروق
وسهرت لين امست نجومي قلايد
وصرت الليالي بين عاشق ومعشوق
وصرت الوصل مابين حاضر وبايد
أنا النخيل وشعري اظلال وعذوق
وانا السحاب اللي على الناس جايد
وفـ ليلةِ حسيت من جرحي اعقوق
وقف النزيف وما بذي له عوايد
صار الورق مابين مهمل ومشقوق
وحار القلم ما بين ناقص و زايد
من الشعر مليت ياحادي النوق
و من الجروح اللي .. تمل الضمايد
و من الحروف ونقصها مع هل السوق
وكذب الحسود .. وهم راعي المكايد
ومجاد لي في كل ساذج ومطروق
وخوفي على غر المعاني الفرايد
عشر السنين وعشر .. والجوف محروق
ما غير أشب أطراف ليلي وقايد
مانيب ادور من ورى نزفي احقوق
و لا ابي من سهر عيني فوايد
لو ما بقالي في الملا غير مخلوق
لا من ذكر شعري .. جفته الوسايد
كني بجبين الشمس .. والليل مفروق
وكني بدمعٍ .. فوق خده نضايد
افداه عمرى .. ماشكى صاحبه عوق
لاشك ما في النفس لو قيل كايد

ترحيبة الحزن والليل

لما يبعد ... في المساطيف المسافر ..

لما يخفيه الضباب ..

لما يرحل ... بالأمل وبفرح باكر ...

لما ينسا لي عذاب ...

هلا ... يا حزن ...

هلا بالصاحب الطيب ...

ابد ... لو تبعد قريب ...

هقيت إنك مع الفرقا ... تبي تنسى حنينك لي ...

هقيت انك بعد مليت ...

من الماضي عذابك لي ...

عسى ما جرحك فرحي ... عسى يا حزن ...

أنا لو خنت في جرحي ...

وضيعني ... الهنا ليله ...

ترى ما في يدي حيله ...

هقيت إني لمحت النور ...

بيمسح دمعي المبهور .. بمنديله ...

سحرني حلو ترتيله ...

لما يسري في الفضا .. نجم السهاد ...

لما يطفيه السحاب ...

لما يملى عمرنا الماضي السواد ...

تصبح البسمه ... صواب ...

هلا بالليل ..

هلا والله ..

يا ضاوي لو أضمك لي ..

على صدري ... وافني فيك أشواقي ..

أماني ...عمري الباقي ...

هلا بالليل ...

حبيبي كسر الفرحة على صخر الجفا الجاير ...

حبيبي حزنه الزاير لياليا ... يحبك ليل ...

يقول ازرع ضنى شوق النوى فيا ...

وأنا في موعد الشكوى ...

أبي شكوى ... أبي دمعة ضنى تسوّى جراح العمر ...

هلا بالليل ... يا ضاوي بالحنين المر ...

هلا ... والله ...

اترامى

اترامى

هذي عاداتي

في كل العمر مره .. اترامى ..

وصدقيني في حياتي ..

ما هقيت اني عقاب .. ولا يمامه ..

انما لعيونك إنتي ..

طرت لاجمل إبتسامة

لين قلتي وين جناحانك..؟

وين جنحاني .. ؟! وطحت ..

طحت من أعلى غمامه..

أنا ما ادري مريت بين أصابعك رمل ..

او على خصلات شعرك .. ماء ..

كانت غبارٍ وظلما

وكنت أطيح ..

وهذا آخر مااتذكر ..

وين ظنك با تجرح .. واتكسر

فـ أي رمل .. أي صخر .. او عدامه ..

ما هقيت أني عقاب ولا يمامه

انما لعيونك إنتي ..

طرت لاجمل إبتسامه

وما ابي غير السلامه

من الجروح .. ومن التداوي

كيف أمس الأرض .. واطيح متساوي

انا صدقت الصغار .. يوم قالوا :

من يحب القمرا يرحل .. لآخر أرض

وينتظر تالي نهار ..

ولا ظهر منها شبر ..

عانق القمرا .. طمر ..

كيف ضاعت كل أحلامي هقاوي ..

يوم قلتي : وين جنحانك ..

وين جنحاني .. ؟! وطحت ..

طحت من أعلى غمامه..

أنا إنت

انا إنت .. يا إنت أنا ..

لو سألوا حبيبي .. عن إسمي حبيبي ..

قل هذا أنا ..

تشبهني عيونك .. سميني المدى ..

غطيني برموشك .. عن عين العدا ..

ظفرني جدايل .. واكتبني رسايل ..

وانسى من أنا ..

واعدني المدينه .. أوقات الغروب ..

امواجي سفينه .. ورمالي دروب ..

بأمشي لين أشوفك .. لين أقرا بكفوفك ..

إسمي .. ومين أنا ..

جده

إسقي كل البحر .. من طلك عذوبه ..

وانثري ضيك عليه ..

في المساء مر .. وشذى عطرك في ثوبه ..

وماسك الشمس بأيديه ..

وش عليه يلعب فـ شعرك هبوبه

ويغسل أقدامك في مده

ويكتم أسرارك في جزره

ويلقى في رملك لـخده لا تعب .. حضن ومخده

وكل ما جا الطاري في عرس وخطوبه ..

وقلنا مين هي العروس ..

قالوا : جده

لسا صوتك أسمعه .. آخر أيام الربيع

ويالمنادي في الطريق .. وش تبيع

بأشتري عمري العتيق .. لو تبيع

ولسا كيلو اربعه له مكانٍ في النفوس ..

وتبقى أيام الرطوبه والطفوله .. والجري تحت الشموس

أجمل أيام فـ حياتي ..

لما بيني وبين ( صالح )

تبتدي حرب البسوس ..

وتنتهي مرة بسهوله .. أنا العب فـ الظلال

وهوَّ يدخل غرفته .. يفتح الرادو ويغفى

وانا أحفر للمراكب .. في حدود الظل مرفا

وفي ضلوعي حلم .. وأمطار وخصوبه

ابني العالم وأهده ..

وكل ما جا الطاري في عرس وخطوبه ..

وقلنا مين هي العروس ..

قالوا : جده

إسقي باقي العمر من طلك عذوبه ..

وشدي أوتار الحنين .. مثل عود

واعزفي قلبي يعود ..

خصله من ليل الظفاير .. وضي من قمر الخدود

نرخي الماضي ونشده .. خيط قي البحر و جلب

ولو رحلنا عنها مدة .. وقلت أسماك الشعب

تبقى دايم هيَّ جده ..

وهي مكان اللي نحب

اه يالجراح

لا جيت أنا بــ سامحك..

تبكي الجراح ما ودها..

مشتاق ودي أصافحك..

عيت يدي لا مدها...

آه. .يا لجراح .. راح اللي راح ..

وراحتي .. من يا ترى بيردها ..

يا حب.. ياذ كرى واسم..

مدري انا ابكي عليك من العذاب اوابتسم..

صدقني في يأسي .. نفسي تبي نفسي تبيك ..

لا يا دفا شمسي تبيك..

ليه خنتني ..الله عليك ..

آه يا الجراح .. راح اللي راح..

وراحتي .. من يا ترى بيردها ..

لا تحاكي عيوني .. يمطر سحاب الملح ..

ولا تلمس أشجوني .. ينبت في قلبي جرح ..

ناظرني يا خلي .. جرح انا كلي ..

وشلون أبـ ارضى الصلح ..

فصل الخريف حبي ..حزن وورق أصفر..

...ودعني يا قلبي..وخل العذاب أقصر..

آه يا الجراح .. راح اللي راح..

وراحتي .. من يا ترى بيردها ..

انتي حلم

انتظرتك .. عمري كله .. وانتي حلم

ومرت الايام والله .. وانتي حلم..

ليه تأخرتي علي ..

توهي مره واسالي ..

كوني في غير الزمان .. والا في غير المكان

كوني عمري .. عمري كله..

اللي باقي .. واللي كان..

انتظرتك عمري كله .. وانتي حلم ..

كل نجمه شعشعت والقلب عتمه .. كانت انتي ..

كل حرفٍ حرك شفاهي بكلمه .. عنك انتي ..

وكل حبي اللي مضى والحب قسمه .. منك انتي ..

كانوا الاحباب ظلك .. بعض احساسك ونورك ..

ما عرفتك يوم كلك .. ياللي في غيابك حضورك ..

انتظرتك عمري كله .. وانتي حلم ..

هذا إنتي .. قولي والله إنه إنتي ..

وين غبتي ؟! .. عني هذا الوقت كله ..

وين كنتي ؟! ..

شيبت عيني طيوفك .. وما أصدق إني أشوفك ..

ياللي قلبي في كفوفك .. نقش حنا ..

وفي جديلك عطر ورد ..

آتمنى .. لو تكوني في فراغ اعيوني وعنى

وفي سموم ضلوعي برد ..

ليه تأخرتي علي ..

وما طرى لك تسألي ..

ليه نأخرتي علي .. وما طرى لك تسألي ..

إنتظرتك عمري كله عمري كله .. وانتي حلم

أحبابك سروا

مابه احد غيري يابنت.. احبابك سروا..

لاتسأليني تغيروا.. يمكن نسوا او مادروا..

ياحلوتي ضاع الوعد.. وباكر بعد..

مري على دروب الجراح.. وتلقين احد غيري..

بالله لاتبكين عندي.. والى رحتي سوى اللي تبين

مالك عزى.. فـ قلبي الحزين

محتار انا اسكت.. ومدري ايش اقول

لاني سبب جرحك.. ولاعندي الحلول

لكن ابوصيك بصبر.. لابد للغايب عذر

وياحلوتي ضاع الوعد.. وباكر بعد...

مري على دروب الجراح.. وتلقين احد غيري

غطي سنا خدك بشال الليل..

وغيبي ياشمس اللي ضيها لغيري..

اه .. لو تعرفي وش كثر انا احبك.. لو كنتي تدري بي

ياعيونها السود.. مابه احد موجود.. غيري انا الموعود

جرحي.. وتعذيبي..

ياحلوتي ضاع الوعد.. وباكر بعد...

مري على دروب الجراح.. وتلقين احد غيري...

خضار وملح

خضار البحر في عينك ..

وملح البحر في اهدابي ..

وعيا البحر لا يسكن ..

أبد في صفحة كتابي ..

قصيده من خضار .. وملح ..

يا أول .. وأخر احبابي ..

انا من شفتها عيونك

ترى ما جفت ثيابي ..

ولو آخر قصيدي بيت ..

كتبته حب في عيونك ..

ولو يحمل همومي بيت ..

سكنت البحر وعيونك ..

ويبقى البحر .. وعيونك ..

وينشف في قصيدي البحر ..

ويبقى العشب .. وعيونك ..

ويزهر في متون الصخر ..

ويبقى الحب .. وعيونك ..

رغم كل الصحاري نهر ..

وانا والجرح والفرقا ..

وهذا الحزن بسبابي ..

ولو ادري البكا له بيت ..

اسوق فْـ دربه ركابي ..

ابي لا غابت عيونك ..

ابل بدمعي ثيابي ...

البتول

كل أرضٍ تشيلك يا ثقيل الحمول
وكل وقتٍ كريمٍ بالرضا والزعل
وين مارحت تلقى لك حبيب وعذول
وين ما كنت تلقى مثل ياسك..أمل
ياطريق الترجي والوله والنحول
والله إني مشيتك... لين حد الثمل
مالقيت فوصولي لغير قبري وصول
ولا عرفت فحياتي مثل عرفي الجهل
لا تظن المسافر من يسوق الرحول
من وقف دون حلمه عاجزٍ ما رحل
وما لمخلوق منجا في الحذر والجفول
ما تصيب السهام ولا يطيش الاجل
الليالي خوات.. مير منهي البتول
والحوادث عشاير مير وين الفحل
ليلةٍ لك .. وليله بالفرح ما تطول
وليلةٍ من شهدها ذب راس الجبل
أتذكّر في عين الشمس طفلٍ خجول
شالته في هدبها وقت لين إشتعل
أعجب الناس وهجه بالجدل والفضول
ما دروا عن (جمال الجرح) لين إندمل
والله اني كتبته في العطش والذبول
لين غصنه تعدل بالورق وإعتدل
والله إني كتبته لين قال الجهول
والله إني كتبته وانتشى واحتفل
ما أتفه الشعر كانه هالحكي اللي نقول
لا تعدى المديح ولا تعدى الغزل
إن لثمت الزهور وصاحبتني الحقول
ماهقيت ان صافي الشهد عيب النحل
مابقى في ضلوعي كود ريح معمول
وثوب شاشٍ عليه من الندامه وحل
ألتفت للطريق وما عبر منه زول
في جفوني تزاحم عبرتي والوجل
طلت يالعمر والا قلعتك لا تطول
طاولتنا الليالي بالسهر والملل
إن تعبنا نحب ولا لقينا قبول
ما تسر الاماني .. ولا يفيد العذل
لكن .. الله كريم وكل همٍ يزول
ما على الله بعيد .. ولا جفاك المحل
كل أرضٍ تشيلك .. يا ثقيل الحمول
وكل وقتٍ كريمٍ بالرضا والزعل

اغفر لي الزله

أبيك في كلمةٍ لو هي خطا تغفـر لي الزله
وردتك ظاميٍ وان عز وصـلك بااقطع حبالي
أحبك ذا ترى أول كلامي .. وآخره كله
ولكن وش يضر اليـوم لو تدري عن احوالي
وخذ ما جـاز لك من هالحكـي واللي تبي خلـه
انا لا قلت ما في خاطري والله ما بالي
ظلال العاشق جروحه ومن ما يتبعه ظله
أمانة يا شعاع الشمس لا تغضب من ظلالي
وتقـدر تطـوي الدرب البعيد وتقـدر تفـّله
ولكن صعب تمنع في الهـوى صبري وترحالي
وتقـدر تغمد السيـف الرهيف وتقـدر تسلّه
ولكن عـند خلاّق البرية علم الأجالي
متى عمرك سمعت بعاشق قد مات من غلّه
هذاك الحاسد وراعي الهوى تتلفه الأمالي
حبيبي من يعـزك في الهوى ما تقدر تذله
ترى قربك يزيدك بالغلا وان عفتني غالي

اربع ليال

من اربع ليال ...

طيقك وقف ...

ما بين الرمش ... والرمش ...

ما غمضت لي عين ...

يا ابن الحلال ...

اما استرح ... والا امش ...

من أربع لال ... في مجلسي منك خيال ...

وفوق الجرايد والكتب ... اسمك حروفه تنكتب ...

يا ابن الحلال ...

اما استرح ... والا امش ...

من اربع ليال ... هبت من ديارك شمال ...

بريح الخزامى ... والنفل ...

أنا الظما ... انتي الأمل ...

داري لها عامين ... ما ربعت ...

وما غمضت لي عين ...

اكذب

صحيح اني انسى الحوداث.. والملامح .. والأسامي

لما أكتب عن آلامي .. شعر ابعد ما يكون ..

عن مجرد جرح دامي .. والأساور .. والمرايه .. والهوى القاسي الحنون ..

عندي هموم القصيدة .. غامضة .. صعبة .. عنيده ..

وانت عاشق للوضوح ..

يتعبك بحري ظلامي ..

ودك بسري أبوح .. وانا آخر همي بوح ..

تكفى لا تزيد فـ خصامي .. وقلي ما تفهم كلامي ..

انا انسى .. الحوادث .. والملامح .. والأسامي ..

2

لما أكتب أغنية مثل (الرسايل ) .. وانا أكذب ..

والخيال العذب كذب ..

كنت لازم أخفي سري وما اقول ..

إن هالمرة شعوري .. هو خيالات الحقول ..

تطرد اسراب الطيور .. عن حقيقة .. عن شعور

ما هو في حب السنابل .. انما تحت الجذور ..

كسروا العشاق بابي .. قطعوا لحمي ثيابي ..

خلعوا الأدراج .. طاحت مزهرياتي الجميلة ..

شققوا جفني كتابي ..وسألو وين ( الجديلة )

( وبسمة العين الكحيلة ) .. ما لقوا في بيتي إلا ..

ما لقوا في صدري إلا.. مالقوا في قلبي إلا ..

أمنياتي المستحيلة ..

وإني احلم .. بس أحلم ..

3

أعبر الشارع معاي .. في الرصيف الثاني قهوة ..

فيها اربع طاولات .. وحده اجلس فيها وحدي ..

ووحده للي يجي بعدي .. ووحدة لأجمل حرف عندي ..

أما رابع وحدة دايم للي مات ..

زحمة .. لكن كل من في القهوة ربعي .. كلهم ..همي ودمعي ..

ليه ما تجلس مكاني .. وهذا شوفي .. هذا سمعي ..

أطلب اقلام ودفاتر .. حاول اكتب عن حقيقة ..

ما هي وجه .. ولا مكان .. ولا دقيقة ..

أدخل الزحمة فـ ضميرك ..

لا تلفّت .. وانت ما في القهوه غيرك .. غمض الدنيا ..

وأكتب .. وإن سأل في يوم سائل .. عن معاني .. عن شعور ..

قله مابين السطور ..

وإلا تدري .. قله أكذب

شمس الورق

أنابظهر من سكوتي قبل شمس الورق ما تغيب
قبل حبر الليالي يجف .. وانا ماغنت جروحي
قصيده .. خذتها من طفل .. ما اظنه ابد بيشيب
ولكنه نزح عني .. مثل إحساسي بروحي
ابا اكتب للسماء نجمه.. ابا اكتب للخزامى طيب
واباكتب لين احس القلب لا يكتب ولا يوحي
يموت في قلبي الشاعر ويغتال المشاعر ذيب
ولا ادري افزع للضحكي .. او أحمي صرختي ونوحي
حزينه هالقوافي لا .. ولكن من يعرف الغيب
سعيده هالقوافي .. بــ انتظر لين آخرة بوحي
تعالي نتيع الضي البعيد في عتمة التغريب
ولو مليتي من أجمل قصايد غربتي روحي

الشمس اللي تغيب

أركض ورا الشمس .. اللي تغيب ..

ابي النهار .. وينتحي ..

أخاف أنا وجهي الى طاح الظلام ..

فوق الملامح .. ينمحي ..

كافي سواد العين والظل الحزين ..

وشمسٍ تبين .. وماتبين ..

ورا السحاب ..

كافي بَعْض ليلٍ يجي .. قبل الغياب ..

عن ليل الغياب

يا موقد الشمعة ..

وجهي أنا .. أو نور ذا الشمعة ..

قاسي الشحوب ..

في رعشة الضي العليل ..

وتكبر مسافات الهروب ..

يا صاحبي الشمعة غروب ..

به قريةٍ .. تحت الظلام .. مريتها ماجيتها

وبنيةٍ .. تحت الظلام ..

ورسالةٍ في الليل ..

خانتها الحروف .. من القهر شقيتها ..

كلي عيون .. وماتشوف

والناس .. ياظل .. وطيوف ..

والظلما .. نسيان .. الحبيب .. لحبيب ..

أركض ورى الشمس اللي تغيب ..

الدواير

يا رامي المـاء .. بالحـصا.. لأجـل الـدواير.. تكـبر..

لا تـوجـع المـاء .. أكــثر.. هـذي حـدود .. الـمـاء..

يـجـيـبــك الـهــاجــوس .. و يــروح بـك..

يا شــين وش نفع الحكي .. لا روح بـك..

تخـط فالـرمـل البحـر.. وتـرزّ وعـودك .. سـاريه..

وتبـقـى الحـقـيـقــه .. عــاريـه ..

ما عـاد في الـسـفـر الا دوايـر ..

بيـن الـكـواسـر.. والبـدن ..

ماكان لي صـدر.. وما كان لي كـف.. لحـمي تـنتـف ..

ناظـر.. عـلى راسـي تحـوم .. عــقـبـان الهـمــوم ..

وتـرســم دوايـر .. وقـلّ لـي .. وش اللـي صـايـر..

وكانـك حـبيبـي .. فـسّـر الكـون ..

و الا حـبيبـي .. اتـرك الـكـون ..

وقـل لي .. من خـذا منـي محـلي .. ليـن ضـاقـت ..

فسّـر اشـتاقـت.. تـبينـي .. حـدد اقـدامي .. جـبيني ..

و آخـر الجـدب .. العــوايـر ..

واتـرك الـمـاء .. لأشـهــب الـمـاء .. و الـدوايــر..

طفله وطفل

غديت انا .. وانتي .. طفلة وطفل ..

تبكين فـ وداعي .. وانا كني مفارق أهل ..

وبيتٍ صغير .. ودربٍ كهل ..

ياللي على خدك كحل .. لوتمسحيه

وتتبسمي .. ما للبكا داعي

ياللي سنا عيونك أمل .. لا تقتليه وتتألمي ..

ما للبكا داعي

يا اول مواعيدي .. ويااخر مواعيدي

انتي فرح عمري .. وجرحي وتسهيدي ..

افارقك ليله .. يا طولها ليله ..

واجيك انا باكر .. وقلبي على إيدي ..

ومادري سبب خوفك .. وانتي العمر شوفك ..

ياللي على خدك كحل .. لوتمسحيه

وتتبسمي .. مال البكا داعي

ياللي سنا عيونك أمل .. لا تقتليه

تتألمي .. مال البكا داعي

وغديت انا .. وانتي .. طفلة وطفل ..

تبكين فـ وداعي ..

سألتي

قالوا سألتي .. عني سألتي ..

وأنا ما ادري ويني .. ضايع ياعيني ..

ما ادرى وش اللي ذكرك ..

مقطع شعر في دفترك ..

والا الكلام عن صاحبك ..

وانت عقدتي حاجبك ..

قلتي كلام كله كذب ..

وليه اتصلتي .. عنى سألتي؟

آخر لقانا في الخريف

تذكري الثوب الخفيف

والبرد .. يوم خفتى علي من البرد..

وامطار الخريف..

ومرت سنة يمكن سنين

ويني أنا ووين السنين؟

قلتي كلام كله كذب

ليه اتصلتي.. عني سألتي ..

صوتك طيور مهاجره ..

مرت في قلبي مسافره ..

والحب .. لو طال الغياب اول مداك وآخره ..

غيبي سنه والا سنين ..

بااجيك انا .. والا تجين ..

» كرات البسكويت بالجااااااالكسي لعيون مطبخ احساس
» شــروط منتدى الأزيـــــــــــاء