بدر بن عبدالمحسن بن عبدالعزيز من شعراء منتدى احساس حلم

عيون الليل

عيونك لاتوريها .. لغيري لاتوريها ..

عيونك لي .. ولو أقدر ..

عيونك عنك أداريها ..

أنا لو بعت نظراتك.. ابيع العمر واشريها

عيون الليل .. انا بالحيل

أحب أسهر لياليها ..

وأحب أبكي .. وهي تبكي ..

وأفرح للفرح فيها ..

حبيبي لو ضمنت اليوم ..

أعيش الشك في باكر ..

يجي مستقبل الايام ..

يغير في هوى الحاضر ..

يغيرك الزمن بعدي .. تعلم طبعه الغادر ..

أخاف عيون مايدرون ..

وش اللي يجرح الخاطر ..

وعيونك آه .. لو يدرون ..

حياتي فيها للآخر ..

عيونك لاتوريها لغيري ..لاتوريها ..

العطش

آه ..يا العطش

جفت اشفاهي

وصوتي الواهي ارتعش

لو حبيبي ما .. ما سقاني الما

لو شربت أظما لحبيبي .. وللعطش

يا سموم القيظ ..جفت عروقي

تحتي الرمضا..واللهب فوقي

والعطش شوقي .. وشوقي للعطش

اسقني عيونكحبيبي .. أو أموت

ما ابي رمشك نعش

يا وسامي الحب ..امطري في القلب

الزهر والعشب ..قلبي يا مطر

الظما .. والجوع .. بعدك .. والدهر

لو حبيبي ما .. ما سقاني الما

لو شربت أظما لحبيبي .. وللعطش

طريقنا واحد

طريقنا واحد ..

امشيه .. معي ..

أحباب .. كانك تبين ..

أصحاب .. اللي تبين ..

يكفي متى .. ما توصلين

تتذكرين ..

إنك حزينه .. وانا حزين

كافي كلام ..

مابي .. وعد ..

أو التزام ..

طريقنا يمحي الظلام

نمشي مسافات الرجوع

ودرب الهوى كله خضوع

ارمي الجرايد والهموم

لا تجبري عيونك تنوم

لا واسمعي همس النجوم

وهم الوداع .. وكثر الحنين

وكافي كلام .. مابي وعد

أو .. التزام

عز الكلام

عز الكلام ..

عز البكا والإبتسام ..

عز العتاب ويا العذاب ..

حتى الندم ذاب والأمل أصبح عدم ..

لما خلت كل الدروب ..

لما إنطوت .. شمس الغروب ..

وضيع معاه قصة هوى ..

وعز الهوى حتى على أهل الهوى

عزت على عينه الدموع .. عند الوداع

سلم يإيده للهوى .. سلم وضاع ..

تحت الليالي ضاع وانتهيت .. يا حب غالي ..

وضيع معاه قصة هوى ..

وعز الهوى حتى على أهل الهوى ..

ياما إبتسامه عاشت زمان ..

في عيون حبيبي .. ذبلت في يوم ..

وياما الملامه .. قست حنان ..

في قلب خايف .. جرحه يهون

وياما الهوى عذب كثير ..

لكن بقي فرحه كبير

إلا حبيبي .. عزت عليه ..

دمعة وداع تملا عينيه ..

العمر أحبك

لليل احبك مابقى في السما نور

والى ضواني الليل .. للصبح أحبك

واللحظة اللي كلها عند وغرور

أشوف قبري بين عينك .. وقلبك

في صدري سراجٍٍ حزينٍٍ .. ومكسور

رغم المطر والريح .. شلته في دربك

والله مابه غير لوعاتي قصور

وخوفي عليك الله ربي وربك

ما بي جهد ابني على صمتك جسور

لا حيرتني أسباب سلمك وحربك

العمر أحبك .. مابقى فيني شعور

والى جفاني العمر .. وشلون أحبك

العشق

العشق .. هو خال .. وزمام ..

والا العيون اللي .. محاجرها ظلام ..

العشق مو قبل السلام ..

أو بعد السلام ..

يابنت أنا أحبك ..

أحبك والسلام ..

***

واناظرك وانتي بشعرك تلعبي ..

باصابعك كل الحديث اللي أبي

ما تعبت ليلي أناظرك .. ومااظنك إنتي بتتعبي

با بنت أنا أحبك .. والسلام ..

***

انا اعرفك يا اخت النهار

الشمس تجذبك بنسب

لو اوصفك وردة و نار

جرحني شوكك و اللهب

ما تعبت ليلي اناظرك

وما اظنك انتي بتتعبي

يا بنت انا احبك و السلام

عطش قلبي

أرفض .. المسافة

والسور .. والباب والحارس ..

آه أنا الجالس ورى ظهر النهار ..

ينفض أغبار .. ذكرى

أرفض .. يكون الإنتظار .. بكرا

أبسقي ..عطش قلبي اليابس..

على اشفاهي ..

بقول أحبك ..

أرفض إني أموت في قلبك

مادرى بموتي أحد .. حتى أنا

أرفض الصورة .. على الرف البعيد

وجهك المحبوس في ورق وحديد

أرفض احساس الحبر

وجرح سكين السطر ..

أرفض الليل ..الحصار

حبنا خلف الجدار

آه أنا الجالس ورى ظهر النهار ..

أنفض أغبار ذكرى

أرفض يكون الإنتظار .. بكرا

مثل البكا .. حبيبتي تحتاجني ..تحت الظلام ..

ومثل الفرح .. حبيبتي أحتاجها .. وسط الزحام

الحب علمها السكوت ..

والحب علمني الكلام ..

أرفض الصمت .. الحوار

بيننا .. خلف الجدار..

أبسقي عطش قلبي اليابس ..

على شفاهي .. بقول أحبك ..

أرفض إني أموت .. أموت في قلبك

مادري بموتي أحد .. حتى أنا

ليه ؟؟!!

ليه

ليه انكسر ... مثل القزاز ..

كل مرةٍ .. أبوح همي .. وتسمعه

ياصاحبي .. وش حاجتك .. في غرشةٍ

طاحت شظاياها بيدك ..

وش حاجتي .. فما تجمعه ..

لي صاحبٍ .. كل مااشتكيت ..

همي عليه

دايم يجرح اصبعه ..

واصاحبي

الشكوى بها ذل ..

حدٍ رهيف .. أما جرح يقتل ..

الشكوى ماتلبس ثياب..

عريانةٍ ماتلبس ثياب ..

في وجه راعيها ..

أموت أنا لو قلتها .. وأموت ابخفيها ..

ياهيه .. وان كانك رفيق

قم دلنى .. على طريق ..

ماهو يوصلني لطريق ..

عن يمةٍ .. غير الجهات الأربعه ..

اطلق حبال الليل .. خل الظلام يسري ..

المركب اللي كل مافل الشراع .. قلنا بعد بدري

ابي .. اوقظ النوم .. وأهدهد اسهادي..

أحفر في رمل وسادتي .. قبرٍ وسيع ..

أبي ادفن اعنادي ..

ابطرد الدنيا وري باب الجفن .. وأغمض اعيوني ..

مابي اعض ابهامي بسنوني .. واشكي عليك ..

الليل كله .. ياصاحبي

نجم يطيح .. خله .. خله يطيح .. لاترفعه ..

أنا انكسر مثل القزاز .. كل مرةٍ تدري بهمي وتسمعه ..

المرايه

المرايه قصيدة

انتي مشغوله بروحك

ما ملك عقلك وروحك

لا أنا.. ولا سوايا

اعطي ظهرك للمرايا .. وشوفي غيرك

اظهري من ليل كحلك ومن أساورك وحريرك

افتحي الشباك مره .. شوفي الناس والشوارع

وش كثر هالغربه مره .. للي وسط الزحمه ضايع

انتي مشغوله بروحك .. ما ملك عقلك وروحك

لا أنا.. ولا سوايا

كلنا عشاق لكن

كل واحد له حكايه ..

كلناعشاق لكن

كلنا نحبك.. نحبك

وأنتي جرحك في ساكن .. وأنا جرحي برا قلبك

أمشي لو نصف المسافة .. وقفي بينك وبيني

أكسري كل المرايا .. أنتي أجمل وسط عيني

يا للي مشغولة بروحك من خذا قلبك وروحك

هو أنا .. ولا سوايا

كلنا عشاق لكن

كل واحد له حكاية

كلنا عشاق لكن

كل واحد له حكاية

كلنا عشاق لكن

كل واحد له حكاية

نجمة الفضه

أعرف الشارع اللي..

فـ اوله دارك ...

واعرف ان القمر .. جارك ...

وعطرك ... هو حديث الريح ...

اعرف ان النجوم ... اتطيح ...

على دروب المدينة ...

إلى صرتي حزينة ...

متى يا نجمة الفضة ...

حجبت الليل عن نُورك ...

متى قلت السما مّلت ...

جحٌودك ... نظرة غرورك ...

صحيح إني ... نسيت اليوم ...

نسيت اليوم ... لا أزورك ..

وأنا .. أنا عرف النجوم تطيح ...

على دروب المدينة ...

إلى صرتي حزينة ...

ناي

في الشارع .. عتمه ونور ..

زحمه .. واشارات المرور ..

تاقف على انفاس الطريق ..

مشيت أنا .. وهمي العتيق ..

وقبل التعب .. مايهدني..

سمعت صوتٍ شدني ..

ناي .. في صوتها ناي ..

غني وجرحني الشجن ..

دقات قلبي .. وقفت..

وخطاي

قالت وش الوقت ...

ناظرت ليل اعيونها ...

وصبح الجبين ..

ومرت ثواني صمت ...

وقلت الزمان .. انتى..

وكوني اللي تبين ...

من يومها ماعاد اناظر ساعتي ..

وش حاجتي .. أعد الزمان ..

وهى الزمان الجاي ...

ما ينقش العصفور

الصدق ..

ما ينقش العصفور .. في تمرة العذق ..

وما وشوش الدبور .. زهرة الرمان ..

والصدق .. ما زاعت أ رض جوفها بركان

وما يحفر الأظفر في جلدة المجدور

وش يخفي الإنسان .. الطيب .. المغرور

عضيت أنا اجساد الحروف الواضحه ..

يا اخت الطريق ..

عضيتها صدق الشفاة الناضحه

شهد وشري ..

وكان الحديث .. جرح ٍ طري ..

مضمد بالياسمين

كان الحديث .. ما هو الحديث اللي تبين ..

وش اللي تبين الصدق.. ؟

وش الصدق ؟!غير الدفا والنور ..

وما يقتل الإنسان الطيب .. المغرور

لو قلت لك .. إني ضعيف ..

هش ٍ كما ورق الخريف ..

أو قلت لك إني أخاف ..

أبكي .. واخفي عبرتي ..

واني لبست .. ثوبي .. عقالي وغترتي ..

با أجامل الليل .. والجفاف

بيعجبك .. هذا الصدق .. وهذا العفاف .. ؟!

بهديك أنا يا مهرتي .. سرج ٍ حرير

وقلادة ذهب ..

وأبا أشتري سيف ٍ رهيف ..

لو ما بقى عندي ثمن .. نصف الرغيف ..

اللي يسد الجوع ..

والجوع .. صدق ..

الجوع .. صدق .. وما سواه ..

يا اخت الطريق ..

كذب .. كذب .. كذب

لا تعاتب

لا تعاتب .. ما اقدر أتحملك عتابك ..

قلبي ذايب .. وانت تشكي لي عذابك ..

بس لو تسأل عيوني .. راح تبين لك شجوني ..

لو أغير يوم حياتي .. عن هواكم ما تغير ..

إنت أغلى ذكرياتي .. انت غيرك ما اتخير ..

بس لو تسأل عيوني .. راح تبين لك شجوني ..

لا تعاتب .. لا تعاتب ..

نور حياتي في رضاك .. والسعاده كلمه منك ..

شوف هنايا في هواك .. لما نلتوا بحسن ظنك ..

بس لو تسأل عيوني .. راح تبين لك شجوني ..

لا تعاتب لا تعاتب ..

يا صاحب

آه يا صحب .. راحوا الأصحاب

والزمن غالب .. والأمل كذاب

والوفا .. آه يالوفا .. خانوا الأحباب ..

ما بقى صاحب ياصاحب .. يستحق اعتاب ..

تضحك دموعي .. للزمن والناس ..

وغدت ضلوعي .. في الرجا والياس

وانت لو تدري شـ اللي في صدري ..

قلت لي .. لا باس ..

ما بقى صاحب ياصاحب .. يستحق اعتاب ..

ضاعت أيامي .. أرجي اللي غاب

شابت أحلامي .. والزمن ما شاب

وش بقى قلي .. غير أنا وظلي

في أرضنا أغراب ..

ما بقى صاحب ياصاحب .. يستحق اعتاب ..

المسافر

لا تلوح للمسافر ..

المسافر راح ..

ولا تنادي للمسافر

المسافر راح ..

يا ضياع أصواتنا .. في المدى والريح

القطار وفاتنا ..

والمسافر راح ..

يالله يا قلبي تعبنا من الوقوف ..

ما بقى بالليل نجمة ولا طيوف ..

ذبلت أنوار الشوارع .. وإنطفى ضيّ الحروف

يالله يا قلبي سرينا .. ضاقت الدنيا علينا

القطار وفاتنا ..

والمسافر راح ..

مادري باكر هالمدينة وشتكون ..

النهار والورد الأصفر والغصون ..

هذا وجهك يالمسافر لما كانت لي عيون ..

وينها عيوني حبيبي ..

سافرت مثلك حبيبي ..

القطار وفاتنا ..

والمسافر راح ..

ناعم يا ندى

ناعم يا ندى في ليل الربيع

يا عمر .. ابتدا وخايف يضيع

نعومة كلام بتمحي الألم ..

وبسمة سلام تخلي العدم ..

جناين محبه .. وخضرة مروج

ومركب ومويه .. ونسمه وموج

قابلتك في حلم واماني رقيقه

وضمك خيالي .. يا وهم الحقيقه

خذتنا الليالي .. في رحلة حنين

نسينا الليالي وعمر السنين ..

وعشنا فـ محبه .. وخضرة مروج

ومركب ومويه ونسمه وموج

حبيبي .. أببكي أبضحك باذوب

وأذوب في حبي جميع القلوب

أحبك لآخر مدى في حياتي

أحبك في همسي .. وكلامي وسكاتي

أحبك محبه .. وخضرة مروج ..

ومركب ومويه .. ونسمه وموج ..

وش كثر إنتي جميلة

بتعلم حروفك 00

عن الشعر كله 00

وادخل كفوفك 00

عن البرد كله 00

واشهر سيوفك 00

في وجه الوقت كله 00

( ياالله 00وش كثر انتي جميلة00

وش كثر انا احب00)

واسند جروحي00

مثل جذع نخله00على هاالمدى00

واركض في صوتك00

وتحمل هبوبك رمالي00

سرابك00جبالي00

دروبك خيالي00

وتبقى جروحي00

عطش الف نخله00هجرها الندى00

واتمنى مره وانتي معايا00

اناظر ورايا00واناظر بعد00

وغير ابتسامك00ماالمح احد000

على هاالمدى000

ما انكر العطر

ماانكر العطر .. وحبيبتي

ومااجحد النور .. وحبيبتي

ومااخفي اشعور

إني احب الشمس ولفتاتها

إني اعشق الليل ونظراتها

ياناس انا معذور

في حبيبتي والشمس

وماانكر العطر

الغت مواعيد النهار .. شمس بدت مثل النهار

ريح المطر لون الخضار ..

حبيبتي أحلى البياض

وأحلى السمار

بالحيل مجبور .. ماأخفي شعور

إني احب الشمس ولفتاتها

إني اعشق الليل ونظراتها

ياناس أنا معذور

في حبيبتي والشمس

وماانكر العطر

خليني فـ عيونك هوى .. همس الحنين

لا تغمض اعيونك علي .. ولا تكذبين

تشرقني الدمعه فـ عيوني

تحرقني اللوعه فـ ظنوني

ياحبي انا والله ماأخونك

وماانكر العطر وحبيبتي

الموعد الثاني

خذاك .. الموعد الثاني ..

نويت ... تغيب .. وتنساني ..

مشت بك .. خطوتك لبعاد ..

وتركت .. لدمعتي ميعاد ..

مثل ذا الوقت تلقاني ..

وخذاك ..الموعد الثاني ..

أحبك .. كلها كلمه ..

ونظرة شوق خداعة ..

عطتني ..بالأمل دنيا ..

غريبه .. يومها بساعه ..

خذتني .. غصب عني لك ..

حسبت إني قمر ليلك ..

واثر شوفك تعداني ..

وخذاك ..الموعد الثاني ..

صديق الليل ..

لو تندم .. على جرح تركته لي ..

لا انسي قلبك المسكين ..

حبيب جرحك قبلي ..

ولكن سكتك تحتار ..

ابد .. بين الندى والنار..

والى منه قضى المشوار..

بدا مشوارك الثاني ..

وعد

وعد .. يا حبيبي ..

في ليلة ما تهجر .. وعد ..

في ليلة ما تغدر .. وعد ..

ابطفي قمرنا ..

وامحى صورنا ..

وانكر بعد .. هوانا ..

يا حبيبي ..

اشوفك بتبعد .. في عتم الطريق ..

وتوقد ما بينك وبيني حريق ..

يا عمر الهنا .. نساني انا ..

لا تنسى أبد ..

حبيبي إبتسامي .. ويكفي الآمي ..

تشوف السعد.. في بسمة حبيبي ..

وين تبدا هالمدينه

وين تبدا هاالمدينه .. كل يوم ..

من رصيفٍ عاريٍٍ تحت النجوم ..

من عناوين الجريده ..

في المواني .. وحمرة عيون المسافر ..

ضحكة الصبح الجديده ..

أخر اوراق التذاكر ..

اوبعد حبر الختوم ..

وين تبدا هاالمدينه .. كل يوم ..

ودي اعرف هاالعواصم ..

وأبي ابدا من يديها ..

ودي انزع من اصابعها الخواتم ..

قبل لاسلم عليها ..

ودي تجمعني بها لحظه حميمه ..

وين تجلس هاالمدينه ..

في العماير .. في الدواير ..

في الدكاكين القديمه ..

اوتحت اهدابك انتي ..

في صدري احساسٍٍ شهي ..

لو يدوم ..

وابي اعرف وين تبدا هاالعيون .. وتنتهي ..

كل يوم ..؟

مدري وش سر العواصم .. والمداين .. والعيون ..

ومدري وش سر الجنون ..

اني اعرف ..

انتظرتك في محطات القدوم ..

وفي مواعيد السفر ..

صك شباك التذاكر ..

وانمحى حبر الختوم ..

وما عرفتك ...

عساك ع القوة عازف الاحزان
عزفت لنا كثيرآ من الاشعار الجميلة والرائعه للشاعر المبدع

الله يعطيك الف عافيه

ننتظر ابداعك

اخوكـ غريــم الشــــــــوق